(Audioa: infozazpi)
Yolanda Barzina Iruñeko udaletxetik Nafarroako Gobernuaren jauregira pasa zelarik, itxaropen tarte ttikia zabaldu zen euskal hiriburuan. Maia alkate berriaren lehen urratsak eta ixilguneak aintzat hartuta, pentsatu nahi izan genuen aro berria irekitzen ari zela, doi doi bazen ere, Iruñean.
Olentzeroen inguruko erabakiak, ohiko debeku batzuen gainditzea, joera berriak atzematen ziren hainbat esparrutan. Maiak ez omen zuen Barzina izan nahi.
Aberri Egunean, esaterako, izugarrizko baldintza estuak eta, jakina, alde zaharretik kanpo, karpa baterako baimena lortu zen. Lehen esan bezala, gauzak aldatuak zirela sinetsi nahi izan genuen.
Ez zen horrela, berriz.
1512ko konkistaren inguruko ekitaldietan esnatu ginen, amets goxoa uxatu eta betiko ametsgaiztoan geundela ulertzeko. Berriz ere, herri mugimenduaren jarduerak debekuen bidez oztopatzeko borondatea agerian gelditu zen, eta Sanferminen inguruan bergauza gertatzen ari da.
Debekuak, Gora Iruñearen festagunearen egitasmo ausart eta erakargarria bertan behera, tentsioa igo nahi dute UPNkoek Iruñean. Bukatu da irekiera saioa, aurreko iluntasunera itzuliko gara?
Ikusi beharko. Jendartearen erantzuna ere neurtzen ariko dira, ziur asko. Nabarmena da haserrea eta pentsatu behar da herri mugimenduak ez direla isilik geldituko.
Baina, batez ere, garai berrian gaudela aintzat hartu behar dute UPNkoek. Jada ez dute balio aurreko aitzakia errezek. Ezin zaio aro honetako erronkari aurreko formulaz erantzun.
UPNkoek, beharbada, sinetsi nahi dute honelako astakeriak debalde pasatzen direla, bestelako ondoriorik gabe. Ez dute atzematen, nonbait, jendarte mailan bildutako haserrea. Ba, erraldoia da. Murrizketek, iruzurrek, ustelkeriak, gehiegikeriek, eta, orohar, UPNren egunoroko jarduerak inoiz baino erreakzio zabal eta sakonagoa eragiten dute, Navarra foral eta españolaren ereduak inoiz baino erakargarritasun gutxiago duelarik.
Dekeku berriek joera hori areagotuko dute, zalantzarik gabe. UPN isolatuago geldituko da, beraz. Ez dirudi oso negozio ona denik, gaur egungo egoeran, halako bidea hartzea.
Baina, bestalde, pentsatzen ahal da debeku eta itxikeriaren garaietara itzultzen direla irekitako zirrikitu ttikian izugarrizko tropela pasatzen ari zelako. Izututa daudelako egin dutela, hots.
Herri mugimenduaren arrakastaren beldur direla begibistakoa da. Baina, kalkulu bat ala bestea eginik ere, makurtzen ari dira, erabaki onartezinak baitira, jendearen haserrea piztuko dutenak, alegia.
Ereduen arteko talka honetan, UPNk itxikeria, espainiartasuna eta neoliberalismoaren ikurrak hartu ditu. Herri mugimenduak, berriz, bestelako Iruñea eta bestelako Nafarroaren ametsa adierazten du.
Lehia, berriz ere, pizturik dago. UPN, PPren babes bakarraz. Herri mugimendua, gero eta lagun gehiagorekin. Argi dago, ezta? Ba, argi esan dezagun, Gora Iruñea!